Verna skog i Biosfæreområdet

Om lag halvparten av artane som er trua på norsk raudliste for artar er knytt til skog. Desse artane er særleg knytt til gamal skog og edellauvskog med lite menneskleg påverknad. Til tross for at vi har mykje skog i Nordhordland, har vi lite av gamle og urørte skogar, samanlikna med andre delar av landet. Derfor er det viktig å ta godt vare på dei gamle skogane vi har.

Bøkeskogen på Vollom

Bøkeskogen på Vollom er den nordlegaste bøkeskogen i verda. Pollenanalyser syner at det vaks bøk her for meir enn 1 000 år sidan. Skogen kan ha etablert seg naturleg, men det er meir truleg at den er planta av menneske. Bøkeskogen er verna som naturreservat.

Granskogen på Otterstadstølen i Modalen

Gran finnast naturleg i det meste av Noreg, men unntak av delar av Vestlandet. Etter at isen trakk seg tilbake etter førre istid for nesten 12 000 år sidan vandre grana inn i Noreg frå aust. Ho har langsomt spreidd seg utover austlandet og sørlandet, og nådd kysten i Trøndelag og Nordland. Men på Vestlandet har ho berre nådd nokre få stadar, som Granvin i Hardanger og Modalen i Nordhordland. Grana finnast likevel i rikt monn over heile Vestlandet, fordi menneske har planta ho ut. Ved Otterstadstølen i Modalen finnast den vestlegaste, naturleg førekommande granskogen i Noreg.

Gripakletten i Meland

Gripakletten er eit ganske nytt naturreservat som vart verna i 2019. Her er det oseanisk furuskog, som er ein type regnskog!