Galleri Salhus: Inger Johanne Brautaset

Spor etter levd liv og tidlegare kulturar har vore hovudtema i Inger-Johanne Brautaset sine arbeid over fleire år. Ofte bygger ho opp sine arbeid lag på lag. Tematisk har ho vore oppteken av kreftene i universet og mennesket si kulturhistorie. I utstillinga «Avtrykk» i Galleri Salhus viser Brautaset både nyare og eldre arbeid.

Utstillinga opna søndag 6.september, med opningstale av avdelingsleiar ved Tekstilindustrimuseet, Inger Lena Gåsemyr.

I samband med utstillingsopninga var det boklansering av Brautaset sin rykande ferske publikasjon. Lanseringa skjedde saman med Vilde Salhus Røed, som har vore redaktør for publikasjonen.

Vilde Salhus Røed (f. 1981, Bergen) er ein biletkunstnar som arbeider på tvers av fotografi, lyd, video og publikasjonar. Ho er frilans redaktør for kunstpublikasjonar og starta nyleg Forlaget Resonnerende Stil. Vilde har utdanning i kunst frå Kunst- og designhøgskolen i Bergen og filosofi frå Universitetet i Bergen.