Galleri Salhus: Inger Johanne Brautaset

Spor etter levd liv og tidlegare kulturar har vore hovudtema i Inger-Johanne Brautaset sine arbeid over fleire år. Ofte bygger ho opp sine arbeid lag på lag. Tematisk har ho vore oppteken av kreftene i universet og mennesket si kulturhistorie. I utstillinga «Avtrykk» i Galleri Salhus viser Brautaset både nyare og eldre arbeid.

Inger-Johanne Brautaset har m.a. utdanning frå Statens Håndverk-og Kunstindustriskole i Oslo med diplom i vev, og frå Vestlandets Kunstakademi i Bergen. Ho har hatt ein lang og aktiv kunstnarkarriere med omfattande utstillingsverksemd både nasjonalt og internasjonalt. I tillegg har Brautaset vore aktiv og engasjert i fagpolitikken med ulike verv både lokalt og nasjonalt og på nordisk nivå.

I samband med utstillingsopninga vert det også boklansering av Brautaset sin rykande ferske publikasjon. Lanseringa skjer saman med Vilde Salhus Røed, som har vore redaktør for publikasjonen.

Vilde Salhus Røed (f. 1981, Bergen) er ein biletkunstnar som arbeider på tvers av fotografi, lyd, video og publikasjonar. Ho er frilans redaktør for kunstpublikasjonar og starta nyleg Forlaget Resonnerende Stil. Vilde har utdanning i kunst frå Kunst- og designhøgskolen i Bergen og filosofi frå Universitetet i Bergen. 

Utstillinga opnar søndag 6.september kl. 14 v/Inger Lena Ottemo Gåsemyr, leiar på Tekstilindustrimuseet.

Boklansering kl. 15 v/Vilde Salhus Røed.