in under genom upp och sedan ut

«in under genom upp och sedan ut» er ei utstilling kuratert av Anna T. Wolgers (SE), som viser verk av 5 markante nordiske tekstilkunstnarar:

Emilia Elfvik (SE) :: Liisa Hietanen (FI) :: Kari Hjertholm (NO) :: Kari Steihaug (NO) :: Grethe Wittrock (DK)

Ei utstilling med lys på tekstilkunstens relasjon til menneskets indre.

Tekstilen og mennesket har følgd kvarandre lenge, dei kjenner kvarandre på djupet. Tekstile materialar og uttrykk følgjer oss tett gjennom alle livets hendingar. Den tekstile kunsten rører ved sinnet, bokstavleg og symbolsk. Det finst kontakt mellom kollektive erfaringar, materialar og rørsler. Den kan berøre slik ein song berører.

Utstillinga sin tittel kan vere ein instruksjon om korleis ein fører nål og tråd inn under og gjennom for å få til eit vakkert sting. Eller slik eit garn ved hjelp av heklenål blir snurra rundt seg sjølv for å skape ein botn, ei flate, eller ein samanheng om ein vil. Same rørsle kan illustrere ein kreativ prosess – ein må inn, under og gjennom for å kome ut til klårleik og innsikt. «Gå den undre och inre vägen», som Gunnar Ekelöf skriver.

Utstillinga blei opna av tekstilkunstnar og tidlegare prof. tekstil Kari Dyrdal 1. juni, og står til og med 1. september.

___________________________

Emilia Elfvik og Liisa Hietanen har fått reisestøtte frå Nordisk Kulturkontakt. Liisa Hietanen har fått transportstøtte frå Frame Contemporary Art Finland