Samlingar

Museumstunet fortel om byggeskikken på strilelandet, med røykstover og lemstover, loft, eldhus mura i stein, og ei grindbygd løe med brakekledning. Til samlinga høyrer også to kvernhus som står sin på opphavlege plass. Det mangfaldige næringslivet på Osterøy er representert med to garveribygningar: Barkhuset på Brakvatne og Garverimuseet på Valestrand. Vi har også to smier: Gjerstad Låsfabrikk frå 1880-åra og Mjedlasmia i Mjeldalen – ei bygdesmie frå 1917. Skulehistoria er representert ved den gamle skulestova frå Kleiveland.

Osterøy museum har gjennom 100 år samla inn, dokumentert og tatt vare på kulturhistorisk kjeldemateriale frå Osterøy og bygdene ikring. I dag er samlingane våre samansett av om lag 18 000 kulturhistoriske gjenstandar, over 7 000 historiske foto, 750 hyllemeter privatarkiv og 22 bygningar.

Museet har hatt fokus på handverk og småindustri, og har i dag ei flott samling av mellom anna åkle, draktutstyr, verktøy til bygningshandverk og husgeråd frå tida mellom 1600-talet og i dag.

Privatarkivsamlinga ved Osterøy museum kjem frå ei stor breidde av bedrifter og privatpersonar. Garveri, møbelfabrikkar og meieri har sett sine spor på Osterøy og er sterkt representerte i arkiva våre. Lagsaktiviteten er også godt dokumentert gjennom arkiva etter dei fleste ungdomslaga på øya, Osterøy idrottslag, og mange fleire lag og foreiningar.

• Oppstadvev
• Borgund-prosjektet: rekonstruksjon av historiske tekstilar
• Tida vi har – tida det tar (blir avslutta i 2021)
• Treskoverkstaden
• Garveri
• Pelsdyr
• Åkle frå Nord- og Midthordland: eit dokumentasjon- og bokprosjekt
• Folkedrakt- og bunadstradisjon i Nordhordland