Om museet og Salhus Tricotagefabrik

Museet tilbyr skreddarsydde formidlingsopplegg for ulike grupper, og har arrangement om tekstil, industrihistorie og kultur for store og små gjennom heile året. Høyr aktuelle strikkeforedrag på vår månadlege strikkekafé, eller opplev dei historiske lokala blir forvandla til verdas koselegaste, pinneklirrande handstrikkefabrikk under Bergen Strikkefestival, kvart år i månadsskiftet september–oktober. Tekstilindustrimuseet er ein fin stad for barnefamiliar, med eigne omvisingar, leikekrok og tekstilaktivitetar for barn.

Tekstilindustrien var blant dei første industrigreinene som blei etablert i Noreg. Hordaland vart eit kjerneområde i bransjen, med tekstile tungvektarar som Arne Fabrikker, Janus og Dale Fabrikker. Mange av fabrikkane produserte strikka klede.Salhus Tricotagefabrik var kjend for slitesterke kvardagsplagg og bomullsundertøy, og merket Krone Maco vart ein klassikar. Fabrikken produserte islendarar, undertøy, sokkar og fritidsplagg i 130 år. No held Tekstilindustrimuseet til i fabrikklokala, og fortel historia om norsk tekstilindustri med utgangspunkt i industribygda.

Fabrikkanlegget ligg idyllisk til ved sjøen nord for Bergen sentrum. I bakken bak fabrikken finn du eit tettbygd miljø med bustadar for både arbeidar og direktør, skulehus og gamleheim. Salhus Tricotagefabrik var ein av dei første fullmekaniserte trikotasjefabrikkane i Noreg, og ein del av den første industrialiseringsbølga. Tettstaden illustrerer dei store kulturelle og økonomiske endringane i Noreg frå 1850 og fram til i dag: vegen frå bondesamfunn til moderne industrinasjon.

Salhus vaks frå å vere ein liten gjestgivarstad på veg frå Bergen til ein travel industristad med tre tekstilfabrikkar: Salhus Tricotagefabrik, Salhus Væverier og Birkelund Trikotasjefabrikk. Det vart eit kompakt samfunn der stad og fabrikk var sider av same sak, og på det meste arbeidde rundt 700 menneske i tekstilindustrien her.

Då røyken frå fabrikkpipa stoppa, vart anlegget vurdert verna som eit døme på norsk trikotasjeindustri. Anlegget vart ein del av Riksantikvaren sitt verneprogram for teknisk-industrielle kulturminne i 1997, og er i dag det einaste nasjonale industriminnet i Bergen. Museet opna for publikum i 2001, etter fleire år med oppgradering av bygningane og maskinparken. I 2020 vart fabrikkanlegget freda.